Meta Inti Hsibt Li Jien Ma Kontx Qed Inħares…

Meta inti ħsibt li jien ma kontx qed inħares,
rajtek twaħħal it-tpinġija tiegħi mal-friġġ
u malajr ħajjartni npinġilek oħra u oħra.

Meta inti ħsibt li jien ma kontx qed inħares,
rajtek titma’ l-qtates abbandunati,
u jien tgħallimt li l-annimali trid tħobbhom u tkun ħanin magħhom.

Meta inti ħsibt li jien ma kontx qed inħares,
rajtek tħawwad il-kejk favorit tiegħi, għalija,
u rrealizajt li l-iktar affarijiet sempliċi fil-ħajja huma l-iktar affarijiet speċjali.

Meta inti ħsibt li jien ma kontx qed inħares,
smajtek titlob,
u tgħallimt li hemm Alla li miegħu nista’ nitkellem kuljum.

Meta inti ħsibt li jien ma kontx qed inħares,
ħassejtek tagħtini bewsa qabel norqod,
u ndunajt kemm jien maħbub minnek.

Meta inti ħsibt li jien ma kontx qed inħares,
jiena rajtek tibki,
u tgħallimt li xi drabi l-ħajja taf tkun kiefra
imma fhimt ukoll li ma jimpurtax jekk tibki.

Meta inti ħsibt li jien ma kontx qed inħares,
rajtek titbissem tbissima ħelwa,
u xtaqt ħafna li anke jien inkun kapaċi nitbissem bħalek.

Meta inti ħsibt li jien ma kontx qed inħares,
jien kont il-ħin kollu qed narak, nosservak,
tieħu ħsiebi u l-familja kollha,
taċċerta ruħek li ma jonqosna xejn,
u inti bla ma taf kont qed tgħallimni kif għandi nkun fil-ħajja.

Meta inti ħsibt li jien ma kontx qed inħares,
jien ħarist…
irrid ngħidlek grazzi
ta’ kulma għamilt
meta inti ħsibt li jien ma kontx qed inħares!